प्रहरीले हवाइ फायर गरेर ईशनाथ नगरपालिका ४ मठियाबाट एकजना भारतीयलाई तस्करीमा संलग्न भएको आरोपमा नियन्त्रणमा लिएको छ । विहार राज्यको पूर्वी चम्पारण कुन्डवा चैनपुर घर भएका १८ वर्षीय सचिन गोसाइँलाई शनिबार मध्य राति पक्राउ गरिएको रौतहटका प्रहरी प्रमुख एसपी रविराज खड्काले जानकारी दिए । ‘गोसाइँको बयानका आधारमा ७० बोरा ३० क्विन्टल केराउसमेत बरामद गरेका छौँ,’ एसपी खड्काले भने । जिल्ला प्रहरी कार्यालय गौर र प्रदेश २ को संयुक्त टोलीले शनिबार मध्य राति भारततर्फ लैजान लागेको अवस्थामा ७० बोरा केराउ बरामद गरेको हो । एसपी खड्काका अनुसार राति १२ बजे रौतहटको मठिया गाउँनजिकै करिब १५ जनाको संख्यामा भारतीय तस्कर जम्मा भएका थिए ।
प्रहरीको गस्ती टोलीलाई देखेपछि तस्करहरू भारततर्फ भागे । त्यसै क्रममा चार राउन्ड हवाइ फायर गरेर एकजनालाई प्रहरीले नियन्त्रणमा लिएको हो । अन्य तस्कर भने भारततिर भागेका एसपी खड्काले जानकारी दिए । पक्राउ परेका गोसाइँको बयानका आधारमा एक घरबाट प्रहरीले ७० बोरा केराउ बरामद गरेको हो । बरामद ३० क्विन्टल केराउको भारतीय बजार मूल्य तीन लाख रुपैयाँभन्दा बढी रहेको प्रहरीको अनुमान छ । ईशनाथ नगरपालिका ४ मठिया नाकाबाट प्रहरीकै मिलेमतोमा दैनिक ठूलो परिमाणमा तस्करी हुने गरेको स्थानीयले बताए । मठियाबाट दैनिक तस्करी हुने गरेको सूचनाका आधारमा प्रदेश २ का प्रहरी प्रमुख डिआइजी प्रद्युम्न कार्कीको निर्देशनमा जिल्ला प्रहरी कार्यालय गौरले विषेश टोली परिचालन गर्न थालेको छ । पछिल्लो समय रौतहटका विभिन्न नाकाबाट नेपाली केराउ भन्सार छलेर भारत जाने गरेको छ ।
[ तपाईसंग वा तपाईको वरिपरी पनि कुनै प्रतिभा, रचना र विकृति विसंगतीका घटना छन् भने हामीलाई galaxykhabar.com@gmail.com मा इमेल गर्नुहोस अथवा ९८६३०३३१७२ मा सिधा सम्पर्क गर्नुहोस् हामी तपाईलाई उच्च प्राथमिकता दिनेछौं । धन्यबाद ।। ]
